|
Степан Иванович Уляшев 1920–13.02.1944 «Книга памяти Республики Коми», том 3, стр. 291. Вöльдiнса газетчик Степан Иванович Уляшев чужліс 1920-ӧд воын. Помаліс 7 класс Помöсдiнса школаын. 1937 воын уджаліс Кулӧмдінса редакцияын «Вöр фронт» газетын наборщикöн, бöрыннас Николай Васильевич Лихачёв редакторӧс вежысьöн. 1940 вося сентябрын босьтісны действующöй армияö. Служитіс Севернöй флотын – Соловкиын, Краснознамённöй Балтийскöй флотын. Ленинградскöй фронт вылын вӧлі 456-ӧд стрелкӧвöй полкын 109-ӧд стрелкӧвöй дивизияын отделениеса командирӧн. Сержант. Гуалісны Нарвалӧн Жердянка районса Устьеысь 700 метра рытыввылӧджык. Эмӧсь медальяс «За отвагу», «За оборону Ленинграда». Ю.П. Сергатова Уджавлiсны вöльдiнсаяс Гижышта аслам вок Степан Иванович Уляшев йылысь, кодöс сизим класс помалöм бöрын корисны уджавны «Вöр фронт» газетö. Сiйöс корис босьтны ёртыс – Иван Николаевич Игнатов, кодi Вöльдiнысь лэччылiс уджавны редакцияö 1937 воын жö неуна водзынджык. Недыр наборщикалöм бöрын воклы сетiсны секретарлысь удж. Ёртъяс öтлаын уджалiсны редакцияын 1939 воöдз. 1940-öд воын Иван Николаевичöс босьтiсны финскöй фронт вылö. Степан кутiс уджавны ёрт местаас редакторлы отсасьысьöн. Но дыр эз уджав, 1940 вося арын ас окота серти мунiс армияö, кöть вöлi сöмын 19 арöс (босьтiсны 20 арöсöн). Веськалiс флотö, Соловецкöй дiяс вылö. Сэнi кöдзыд, но Стёпа асьсö ёнмöдiс дзолясянь. Тулыссянь арöдз мыссис да киськасис струба ваöн, а тöвнас зырасис лымйöн. Мамö видлiс: висьман пö, а сiйö вочавидзлiс: ме пö закаляйтча, а ог висьмöдчы. Гижавлiс дженьыдик письмöяс. Видза оланныд пö ставныд. Бура олöй, эн висьöй. Володя да Галина, бура велöдчöй. Менам ставыс бур. Абу кöдзыд. Тiян пи да вок Степан – сержант Уляшев. Пансис Великöй Отечественнöй война. Стёпалы мойвиис дорйыны кытшö босьтöм Ленинград. Пöгибнитiс Нарвскöй районын Усть-Жердинск посёлок дорын, сылы вöлi сэки сöмын 23 арöс. Дзебöмаöсь öтувъя гуö. Менам мöд вокöй ветлiс Ленинградö Степанлӧн гу вылö. Нуис бать-мамлöн да чой-воклöн синваöн кöтöдöм му (вокöй сiдзжö вöлi война вылын). Гижис и кывбур да сiйöс лыддьöмöн копыртлiс юрсö пöгибнитöм том йöзлöн гу вылын: Слава вам, храбрые, Слава, бесстрашные, Вечную славу поёт вам народ. Доблестно жившие, Смерть сокрушившие, Память о вас никогда не умрёт. Владимир вокöй мöдысь на ветлiс воклöн гу вылас, но сiйö абу нин вöлöма важ местаас – нуöмаöсь ленинградсянь 350–400 километр бокö (бöрыннас лöсьöдiсны памятник). Содта, мый «Вöр фронт» нима вöлi и миян колхоз. Век нималiс бурöн. 1936 воын сiйöс пасйисны Трудöвöй Гӧрд Знамя орденöн, сетiсны машина да 10 сюрс шайт. Шофёрöн вöлi Вöльдiнса морт Константин Николаевич Уляшев. Война пансьöм бöрын сiйö машинанас и мунiс фронт вылö. Война помасьöм бöрын волiс гортас. Нöшта содта, мый Вöльдiнса школаысь босьтiсны «Вöр фронт» газет редакцияö то ли 1943-ӧд, то ли 1944-ӧд воын ответственнöй редакторöн коми кыв велöдысь Александра Ильинична Челпаваöс (бöрын лоис Лютоеваöн). Галина Уляшева. Пожöгдiн. «Парма гор» газетысь
|
||
|
Материал предоставлен Вольдинской библиотекой
|
